Sipas American Fertility Society (AFS) anomalitë mülleriane (të mitrës) klasifikohen si më poshte:

1. Hipoplazia/agenezia (mitra e vogël ose mungon fare). Rokitansky syndrome.
2. Uterus unikorn
3. Uterus didelf
4. Uterus bikorn
5. Uterus septa(mitra me perde, me septum)
6. Uterus arkuat
7. Anomali të shkaktuara nga dietilstilbestroli.

Mitra formohet pas bashkimit të duktuseve müllerianë të cilët më pas fuzionojnë në mes duke dhënë formën karakteristike trekëndore të mitrës normale. Keqformimet uterine janë pasojë e një defekti në fuzion (mungesë apo fuzion jo i plotë) i duktuseve mülleriane.

Incidenca e anomalive uterine është e vështirë të llogaritet me saktësi, për shkak të sistemeve të ndryshme të klasifikimit. Ajo varion nga 0.1-3.5% Më të shpeshta këto anomali janë në femrat që kanë probleme me fertilitetin, me aborte të përsëritura apo me lindje premature.

Përveç problemeve në fertilitet, këto keqformime ndikojnë edhe në evolucionin e shtatzanisë. Shtatzania dhe lindja në term janë të mundura në rastin e uteruseve bikorn, septa apo didelf. Femrat me anomali mülleriane kanë rrezik më të rritur se popullata për beancë cerviko-istmike, abort spontan, lindje preterm, paraqitje pelvike, paraqitje fetale anormale apo IUGR (peshë të vogël të bebit).

Në rast se mjeku gjinekolog dyshon për anomali uterine atëherë a imund të kërkojë nga ju që të kryeni një apo disa nga ekzaminimet e mëposhtme për të kornfirmuar apo përjashtuar diagnozën:

• Ekografia gjinekologjike 2D / 3D
• Histerosalpingografia (HSG)
• HyCoSy
• Histeroskopia
• Laparoskopia
• Rezonanca Magnetike (MRI)